Durangon bi emakumeri sexu-erasoa egiteagatik atxilotutako 19 urteko gizona espetxera bidali dute

Joan den apirilaren 6an Durangon bi emakumeri egindako sexu-erasoak egotzita, 19 urteko gizonezko bat Basauriko kartzelan espetxeratzea agindu du larunbat honetan epaile batek, Segurtasun Sailak jakitera eman duenez.

Sexu-erasoa jasan izana salatu zuten apirilean bi emakumezkok Ertzaintzaren aurrean. Delitu biak egun berean izan ziren, apirilaren 6an, horien artean oso denbora tarte txikia igarota, ordu bat edo ordu eta erdiko tartea, alegia. Emakumeetako bati kalean eraso egin zion, eta besteari, berriz, atari baten barruan.

Durangoko ertzain-etxeak ikerketa abiatu zuen, eta 19 urteko gazte bat identifikatu zuen, bi sexu-erasoen ustezko egilea zelakoan. Susmagarria ostiral honetan atxilotu zuten, eta larunbat goiz honetan Durangoko Guardia Epaitegiaren esku utzi. Azkenik, epaileak Basauriko espetxera bidali du atxilotua.