28 urteko gizon bat hil da Arguedasen izandako trafiko-istripuan

28 urteko gizon bat hil da bart Arguedasen, NA-134 errepidean, izandako trafiko-istripuan. Bart iluntzean izan da ezbeharra, 22:00ak inguruan. Murillo el Frutoko bizilaguna da hildakoa.

Foruzaingoak jakitera eman duenez, ibilgailua bidetik atera, errepide ertzeko hesia jo eta irauli egin da. Gidaria bakarrik zihoan barruan, eta harrapatuta geratu da. Tuterako parkeko suhiltzaileek atera dute bertatik.

Larrialdietarako zerbitzuetako langileak gizona suspertzen ahalegindu badira ere, bertan hil da. Nafarroako Medikuntza Institutura eraman dute, autopsia egitera.