Gizartea -
Emakumeen kontrako indarkeria
Gizon bat atxilotu dute autobusean emakume bati ukituak egiteagatik
Alboko jesarlekuan jarri zela esan zuen emakumeak, baina gizonari hainbat aldiz arreta deitu ostean beste jesarleku batera joan behar izan zuen.
Erredakzioa
Ertzaintzak 26 urteko gizon bat atxilotu du Donostian, autobusez berarekin zihoan emakume bati ukituak egitea egotzita. Madrildik zetozela, emakumeak beste jesarleku batera joan behar izan zuen, atxilotuaren jarreraren ondorioz, Eusko Jaurlaritzako Herrizaingo Sailak azaldu duenez.
SOS Deiak-ek emakume baten deia jaso zuen atzo goizeko seietan, eta dei horretan gizon batek hainbat aldiz ukituak egin zizkiola azaldu zuen, lotan zegoela aprobetxatuz.
"Jaramonik ez"
Ertzaintzaren patruila bat Gipuzkoako hiriburuko autobus geltokira bertaratu zen, emakumea aurkitzeko asmoz, eta biktimak ustezko erasotzailea identifikatu zuen. Atxilotuak ertzainen aholkuei "jaramonik” egin ez ziela gaineratu dute.
Atxiloketa ostean, polizi-etxera eraman zuten eraso sexualen delitu bat egotzita.
