Elkarretaratzea deitu dute gaurko Baionako bestetako hilketa eta sexu-erasoak salatzeko

Besten lehen egunean, Baiona Ttipian hiru gizonen jipoia jaso eta astebetera hil den 46 urteko gizonaren kasuak samina eta haserrea eragin ditu Lapurdiko hiriburuan. Gaur arratsalderako, elkarretaratzea deitu dute gizarte eragileek Baionako herriko etxearen aurrean, hilketa hori eta jaietan gertatutako lau sexu-erasoak salatzeko.  

Baionako peñek, ostalaritza eta auzotarren elkarteek eta PAF elkarte feministak egin dute deialdia, "biolentziarik ez" lelopean. 

46 urteko gizasemea lurrean etzanda aurkitu zuten uztailaren 26an, larri, Kortsarioen Kaian dagoen jatetxe baten ondoan. Nonbait, etxe atarian txiza egiten ari ziren hiru gizoni kargu hartu zien, eta horiek kolpeka erantzun zioten. Ihes egin zuten gero. Poliziak lekukoak eskatu ditu, eta ustezko erasotzaileetako baten erretratua zabaldu du. 

Hilketak besten ereduaren inguruko eztabaida ekarri du mahai gainera, eta oposizioak hausnarketa egiteko deia egin dio herriko auzapezari. Baionako bestetan marka guztiak hautsi dituzte aurten, 1.300.000 bisitari jaso baitituzte.