Gizartea -
Munduko Txapelketa
Jenni Hermosok “neurri eredugarriak” eskatu ditu, Rubialesen musuaren ondoren
Jokalariak bere agentziaren eta FUTPRO sindikatuaren esku utzi du kasu honetan solaskide izatea. Emakumezkoen Futboleko Liga Profesionalak, bere aldetik, Rubiales karguan jarraitzeko gaitasungabetzea eskatu du.
Agentziak | EITB Media
Munduko Txapelketaren ostean, Espainiako Futbol Federazioko presidentearen baimenik gabeko musua jaso zuen Jennifer Hermoso jokalariak Futbolari Profesionalen Elkarteari (FUTPRO) eta bere ordezkaritza duen TMJ agentziari eskatu die kasu honetan bere ordez aritzeko, "bere interesak" defenda ditzaten eta RFEFri "neurri eredugarriak" eskatzeko.
"FUTPRO sindikatua, TMJ agentziarekin koordinatuta, nire interesak defendatzeaz eta gai honi buruzko solaskide izateaz arduratuko da", esan du Hermosok gaur, asteazkena, sindikatuak bere sare sozialetan zabaldu duen komunikatu batean.
Era berean, FUTPROk "emakumeen duintasunaren aurkako jokabideen aurkako gaitzespen irmoa" adierazi du bere komunikatuan, eta "beharrezko protokoloak ezartzeko, gure jokalarien eskubideak zaintzeko eta neurri eredugarriak hartzeko" eskatu dio Espainiako Futbol Federazioari.
"Ezinbestekoa da gure selekzioa, gaur egungo munduko txapelduna, berdintasun- eta errespetu-balioak esparru guztietan proiektatzen dituzten pertsonen bidez ordezkatzea. Beharrezkoa da berdintasunaren aldeko borrokan aurrera egiten jarraitzea. Gure jokalariek ausardiaz gidatu dute borroka hori, eta gaur egungo egoerara eraman gaituzte", esan du FUTPROk.
Halaber, Kirol Kontseilu Gorenari (CSD) ere dei egin diote, "bere eskumenen barruan, sexu-jazarpen edo abusuen, matxismoaren eta sexismoaren aurka laguntza eta bultzada aktiboa" eman diezaion. FUTPROren komunikatua amaitzeko, "futbolarien eskubideak urratzen dituen jarrera edo jokabide oro" errefusatu dute.
Beste salaketa bat
Bestalde, Emakumezkoen Futbol Liga Profesionalak (F Liga) salaketa aurkeztu du gaur Rubialesen aurka CSDren aurrean, eta karguan jarraitzeko gaitasungabetzea eskatu du. FIFAren Emakumezkoen Munduko Kopako finala "portaera lotsagarria" erakutsiz "zikindu" egin zuela eta "oso gertaera eta jokabide larriak" izan zituela iritzi diote.