Urrezko Egunsentiko bi kide tiroz hil dituzte Atenasen

Urrezko Egunsentia Greziako alderdi politiko neonaziaren bi arduradun tiroz hil dituzte larunbat honetan Atenasen izandako tiroketa batean. 'Kathimerini' kazeta greziarrak zabaldu duenez, tiroketa Neo Iraklio auzoan jazo da, alderdi politiko horren egoitza batetik gertu. Hildako bat alderdiaren tokiko idazkaria da.

Motor batean zihoazen bi gizonezkoek AK-47 fusilekin tiro egin dute. Bi hildako izan dira: horietako bat, 23 urtekoa, bertan hil da, eta bestea, 21 urtekoa, ospitalerako bidean hil da, Skai telebista-kate greziarrak jakitera eman duenez. Poliziak oraindik ez du argitu jazoeraren nondik norakoak.

Joan den irailaren 17an Urrezko Egunsentiko zale batek Pavlos Fyssas hip-hop abeslari hil zuen. Horren ondorioz, Poliziak alderdi neonazi horretako hainbat kide atxilotu zituen, hilketa horrekin lotura zutelakoan. Alderdi horrek, berriz, akusazio guztiak ukatu ditu, eta Urrezko Egunsentiko kideen aurkako jazarpen politikoa salatu du.