GMk kalte-ordainak iragarri ditu 13 hildako eragin dituen akatsagatik

General Motors enpresak bere gain hartu du 2,6 milioi ibilgailutako akatsaren erantzukizuna, akats horren ondorioz, gutxienez 13 pertsona hil ostean. 15 langile kaleratuko ditu enpresak eta kalte-ordainak iragarri ditu biktimentzat.

Mary Barra General Motors etxeko kontseilari delegatuak iragarri ditu neurriok, Detroiteko egoitzan langileekin egindako bileran.

Izan ere, astelehenean horren inguruko barne-txostena jaso zuen Barrak, Anton Valukas AEBko garai batelo fiskal nagusiaren eskutik. Valukasek ignizio sisteman izandako akatsaren inguruko ikerketa egin du konpainia barruan.

Barrak adierazi duenez, txosten horrek agerian utzi du ''arduragabekeri eta gaitasun eza'' izan dela akatsaren aurrean konpainiak izan duen jardunean. Hala, ikerketak erakutsi du hainbat langileek ez zutela jakitera eman zenbait bizi salba zitzakeen informazioa; beste hainbatek ez zuten erantzukizuna bere gain hartu, Barraren arabera.

Ondorioz, GMko buruak iragrri du 15 langile kaleratuko dituztela, eta beste seiren kontra diziplina-neurriak ezarriko dituztela. Konpainiak, dena den, ez du langileen izenik eman.

Akatsak AEBko 2,6 milioi ibilgailuren ignizio sistemari eragiten dio eta, horren ondorioz, gerta daiteke airbag sistema ez aktibatzea istripua dagoenean.