NBEk larrialdi mailarik altuena ezarri du lehenengoz lau herrialdetan

Nazio Batuen Erakundeak, historian lehen aldiz, larrialdi humanitario mailarik altuena ezarri du, alegia, 3. maila, nazioarteko lau herrialdetan (Irak, Hego Sudanen, Sirian eta Errepublika Zentroafrikarrean), Irakeko egoera aurreko asteazkenean mailarik altuenera igo eta gero, Foreign Policy aldizkariak jaso duenez.

"Ez dut neurri horretako krisirik sekula ikusi", esan du Noah Gorrschalk AEBko Oxfam erakundeko politika humanitarioen kontseilariak.

Gainera, "nazioartea historiako unerik larrienetarikoan dago, zenbait krisialdi humanitario daudelako momentu berean, eta denak gizakiak eragindakoak", esan du. Nahiz eta krisiek ondorio humanitarioak dituzten, "irtenbide bakarra politikoa da", ziurtatu duenez.

3. maila, NBEk ezartzen duen altuena, NBEren erakunde humanitario nagusien ordezkariek eta bestelako erakunde nabarmenek osatutako batzorde batek ezartzen du.

Larrialdi egoerak zenbait helburu ditu, esaterako, krisi bat neurri, tamaina eta konplexutasun handi batera heltzen denean, nazioarteak baliabideak lehenestea. Gainera, gatazka horiek beharko duten finantzaketa ere aurreikusten du.