Kongoko ebola kasuak independenteak direla baieztatu du MOEk

Munduko Osasun Erakundeak (MOE) asteazken honetan baieztatu duenez, Kongoko Errepublika Demokratikoko ebola agerraldia ez dago Afrika Mendebaldekoarekin lotuta.

MOEk ohar bidez azaldu duenez, Ecuador probintzian ebola kasuak atzeman zituztela baieztatu zuen atzo Kongoko Errepublika Demokratikoko Gobernuak. Ikerketen arabera, birusaren jatorria ustez ebolarekin kutsatuta zegoen animalia basati bat da. Antza denez, gizonezko batek kutsatutako animalia hori ehizatu eta haren emazteak animalia garbitu eta sukaldatu egin zuen. Emakumea gaixotu eta ospitale batera eraman zuten, baina abuztuaren 11n hil zen heriotza zerk eragin zion argitu gabe.

Gaixoarekin harremanetan egon ziren zenbait osasun langilek ebola birusaren sintomak izaten hasi ziren hurrengo astean. Uztailaren 28a eta abuztuaren 18a bitartean ustez ebolaz kutsatutako 24 pertsona zenbatu ziren, eta horietatik 13 hil egin ziren. Hildakoak emakumearekin harremanetan egon ziren osasun langileak, gorpua manipulatu zuten langileak edota gaixoaren senideak ziren.

Kongoko Errepublika Demokratikoan ebola birusaz kutsatuta egon daitezkeen hamaika lagunak bakartuta daude. Gaixo dagoen inor ez da berriki Afrika Mendebaldeko herrialderen batean izan, beraz, "Kongoko Errepublika Demokratikoko agerraldiak Afrika Mendebaldekoarekin loturarik ez duela uste da gaur- gaurkoz".

1976az geroztik Kongoko Errepublika Demokratikoan ebola agertzen den zazpigarren aldia da, hain zuzen ere, bertan azaldu zen birusa lehendabizikoz 1976an. Bestalde, birusa Afrika Mendebaldean agertzen den lehen aldia da, eta dagoeneko 1.427 pertsona hil ditu, azken datuen arabera.