Istiluak kaputxadun talde baten eta Poliziaren artean, Atenasen

40 bat lagunek osatutako kaputxadun talde batek aurre egin dio gaur, larunbata, Poliziari Atenasko erdigunean. Protestariek harriak eta molotov koktelak jaurti dituzte autobus baten kontra eta su eman diote, Reutersek zabaldu duenez, bertoko hedabideak aipatuta.

Liskarrak Unibertsitate Politeknikoaren inguruetan jazo dira, Exarchia auzotik gertu. Izan ere, gune horretan bizi ohi dira faxisten kontrako taldeak eta anarkistak.

Kaputxadunek autobusa hustu arte itxaron dute molotov koktelak jaurtitzeko, hedabide greziarren esanetan.

Gainera, ordu batzuk lehenago, 200 bat pertsonak elkarretaratzea egin dute Alemaniak Atenasen duen enbaxadaren aurrean, Berlinek Greziako Gobernuari egiten dion presioa salatzeko, negoziazioak direla eta. Alabaina, deialdi hori erabat baketsua izan da.