Mundua -
Bidaia ofiziala
Aita Santua Afrikatik itzuli da, erlijioen batasuna aldarrikatu ostean
Aita santuak lehenengo aldiz hitz egin du meskita batean, eta "bake" eta "bizikidetza" mezua zabaldu nahi izan du Afrika Erdiko Errepublikan, Kenyan eta Ugandan.
agentziak | erredakzioa
Frantzisko aita santua Afrika Erdiko Errepublikatik Erromara itzuli da, Afrikara egin duen lehenengo bidaia ofizialari amaiera emanez, eta sei egunez hiru herrialde bisitatu ostean (Afrika Erdiko Errepublika, Uganda eta Kenya).
Aita santuaren bisitarako aparteko segurtasun neurriak ezarri behar izan dituzte Afrika Erdiko Errepublikan; izan ere, duela bi urtetik gatazka latza bizi dute milizia kristauek eta musulmanek, eta milaka dira hil dituzten pertsonak.
Aita santuak "bake" eta "bizikidetza" mezua zabaldu nahi izan du hiru herrialdeetan, indarkeria eta giza eskubideen urraketa nagusitzen ari delako, Afrika Erdiko Errepublikan bereziki.
Frantzisko aita santuak "elkarrizketa" eskatu die kristau eta musulman komunitateei, hildakoez gain, milioi bat errefuxiatu ere eragin baititu gatazkak.
Hala, Frantziskok hitzaldia eman du Banguin kristauen eta musulmanen "batasuna" aldarrikatzeko, eta indarkeriari eta gorrotoari "ez" esateko, jainkoaren izenean "interes partikularrak" defendatzen dituztelako.
"Elkartuta egon beharra daukagu, jainkoaren irudia desitxuratzen duten ekintzak, datozen tokitik datozela, eteteko. Izan ere, funtsean, interes partikularren defentsa da helburua, guztion onuraren kontra. Elkarrekin esan diezaiogun ezetz gorrotoari, mendekuari, indarkeriari. Jainkoa bakea da, salam", azpimarratu du.
Aita santua gaur goizean bildu da musulmanekin, eta hitzaldia eman du meskita baten barruan, lehen aldiz.
