Itxi

Mundua

Hauteskundeak Erresuma Batuan

Independentistek garaipen zabala lortu dute Eskozian

agentziak | erredakzioa

Eskoziako Alderdi Nazionalistak (SNP) 129 eserlekuetako 63 eskuratu ditu, eta gehiengo osotik oso gertu geratu badira ere, ez dute errepikatu.

Eskoziako Alderdi Nazionalistak (SNP) garaipen zabala lortu du atzo Erresuma Batu osoan egin ziren hauteskunde autonomikoetan, 129 eserlekutatik 63 eskuratuta.

Nicola Sturgeon buruzagi independentistak adierazi du "historia" egin dutela, Edinburgoko Parlamentuko gehiengo osotik oso gertu geratu direlako, nahiz eta lehen bazuten.

Kontserbadoreek 31 eserleku lortu dituzte, 1992tik lortu duten emaitza onena; eta laboristek izan dute galera handiena, 13 ordezkari gutxiagorekin.

Alderdi independentistak hauteskunde orokorretako emaitza berretsi du, Erresuma Batuko hirugarren indar bihurtu baitzen, Eskoziari dagozkion 59 eserlekuetako 56 eskuratuta.

Oraindik botoak zenbatzeko bazeuden ere, Sturgeonek esan du SNP izan dela, "zalantzarik gabe", irabazlea.

Eskoziako Parlamentuak eskumen berriak kudeatu beharko ditu aurrerantzean, zerga alorrean bereziki, 2014ko erreferendumaren ondoren Londresek eman zizkionak hain zuzen ere.

Sturgeonek hartu zuen SNPren eta Gobernuaren buruzagitza erreferendum horren ondoren, Alex Salmonden tokian, eta dagoeneko aurreratu du ez duela beste erreferendum bat antolatuko eskoziarren gehiengoak independentzia babesten ez badu.

Hala eta guztiz ere, ohartarazi du salbuespena egingo lukeela britainiarren gehiengoak ekainaren 23ko erreferendumean Europar Batasunetik ateratzea erabakiz gero, eskoziarrak europazalegoak direlako.

  • Bisitatuena

      Kargatzen ikusiena
      Kargatzen ikusiena