Mundua -
SIRIA
Gutxienez 73 pertsona hil dira Alepo hegoaldean izandako liskarretan
Azken astebetean indarkeria nagusi da Alepon. Siria osoan iragan otsailetik indarrean dagoen su-etena kolokan jarri du Alepoko indarkeriak. Azken egunotan, 284 zibil hil dira, gutxienez.
AGENTZIAK | ERREDAKZIOA
Gutxienez 73 hil dira, atzotik, Alepo (Siria) hegoaldean, bertako armadaren eta Nusra Frontearen (Al Kaidaren adar bat) arteko enfrentamenduetan.
Siriako Giza Eskubideen Behatokiak jakitera eman duenez, hildako 43 armadako kideak dira eta gainerakoak erregimeneko aktibistak.
Nusra Frontea, Yund al Aqsa eta Sham Libreak taldeek atzo goizean hasi zuten erasoaldia Alepo hegoaldean: Jan Tuman, Abu Ruil, Jirbert Hach Azu eta Al Jalediya herriak hartu dituzte. Enfrentamendu oso gogorrak izan dira soldaduen eta aipatutako taldeotako kideen artean.
Behatokiak gaineratu duenez, atzo beste eraso bat izan zen Um al Karamil herrian, hori ere, Alepo hegoaldean. Gutxienez, 12 pertsona hil ziren, bost zibilak. Gerra-hegazkinek inguru osoa bonbardatu zuten.
Atzo gauerditik, Alepon 48 orduko su-etena ezarri zutela jakinarazi zuen Siriako Indar Armatuen Komandantzia Gorenak, agiri batean, baina erasoek ez dute etenik izan.
Su-etena, kolokan
Azken astebetean indarkeria nagusi da Alepon. Siria osoan iragan otsailetik indarrean dagoen su-etena kolokan jarri du Alepoko indarkeriak.
Indarkeriak gutxienez 284 zibil (156 erregimenaren kontrolpean dauden eremuetan eta 128 matxinoen esku dauden tokietan) hil ditu azken egunetan, Alepon.
