Mundua -
Bozak Britainia Handian
Clegg, alderdibitasuna kolokan jar lezakeen hautagaia
Alderdi Liberal Demokratako buruzagiak lehenengo hauteskunde eztabaidan izan zuen arrakastak hankaz gora jarri zituen inkestak, eta laboristek kontserbadoreekin izan ohi duten borroka hautsi zuen.
Erredakzioa
Nick Clegg Alderdi Liberal Demokrataren 43 urteko buruzagia ezezagun bat izatetik inkesta guztiak hankaz gora jarri zituen hautagai izatera pasa da Britainia Handiko hauteskundeetan, izan ere, lehenengo hauteskunde eztabaidan arrakasta handia lortu zuen.
Apirilaren 15ean, telebistaz eman zuten hauteskunde eztabaidan, agertoki politikoaren erdi erdian kokatu zen ordura arte ezezaguna zen hautagaia.
Britainia Handiko prentsa sentsazionalistak "Obama britainiarra" edo "Churchill berria" ezizenak jarri zizkioten, eta egia da Alderdi Liberal Demokratan mugarri bat markatuko duela.
David Cameron hautagai kontserbadoreak zuen "aldaketarako" itxaropenari protagonismoa kentzeaz gain, hauteskunde orokorretarako hautagai freskoena da.
Alderi horrek Britainia Handian izan duen susperraldiak planteamendu berriak sortu ditu gobernua osatzeko garaian; hori horrela, datorren gobernua liberalek eta laboristek osatuko dute, edo kontserbadoreek aginduko dute gutxiengoan.
Hezkuntza pribilegiatua jaso zuen Cleggek (Westminsterren ikasi zuen). Aita kontserbadoreak banketxe batean egiten du lan eta aiton-amonak errusiarrak eta ingelesak dira. Ama, berriz, holandarra da.
Cleggen emaztea Miriam Gonzalez espainiarra da eta hiru seme-alaba dituzte.
Agnostikotzat du bere burua, nahiz eta seme-alabak eskola katoliko batera eraman. Antropologia ikasi zuen Cambridgen, eta Minnesotan (AEB) amaitu zituen ikasketak.
2006an, Paddy Ashdown Alderdi Liberal Demokrataren lehenengo buruak alderdiaren buruzagitzara aurkezteko eskatu zion Cleggi, Charles Kennedyren dimisioa dela eta. Hala ere, Cleggek uko egin zion aukera horri.
Baina 2007an, Menzies Campbellek Alderdi Liberalaren buruzagitza utzi zuenean, Cleggek eskuratu zuen postua.