Obamak bertan behera utzi du Duterterekin hitzartutako bilera

Barack Obama AEBko presidenteak bertan behera utzi du, bihar, Laosen, Rodrigo Duterte Filipinetako presidentearekin egitekoa zuen bilera, agintari filipinarraren irainengatik.

Dutertek "putakume" deitu zion Obamari, AEBk Filipinetako Gobernuaren narkotrafikoaren kontrako politika ezbaian jarri ostean.

Irainen ondoren, Filipinetako Errepublikak eta AEBk harreman estua izaten jarraituko duten esperantza agertu zuen Obamak. Halaber, Obamak Filipinetako agintariei deitzeko eskatu zien bere aholkulariei, Duterterekin hitzartutako bileraren eguna egiaztatzeko.

Ned Price AEBko Segurtasun Nazionalerako Kontseiluko bozeramaileak The Wall Street Journal egunkariari esan dionez, "Obamak ez du aldebiko bilera egingo Filipinetako presidentearekin".

Salvador Medialdea Filipinetako idazkari exekutiboak gaur adierazi duenez, Rodrigo Dutertek bere herrialdearen burujabetza azpimarratu besterik ez zuen egin. "Dutertek esan nahi zuena da Filipinetako Errepublikak lurralde propioa duela eta arazoei gure erara erantzuteko gai izan behar dugu", Medialdearen iritzian. "Ez daukagu arazorik AEBrekin, gure aliatuak dira aspaldidanik", gaineratu du.