Mundua -
Petrolio isuria
BPko buruzagia kaleratuko lukeela esan du Obamak, bere esku balego
Mexikoko Golkoa kutsatu duen petrolio isuria amaitzeko noren "ipurdia ostikatu" behar duen jakiteko adituekin hitz egiten ari dela adierazi du AEBetako presidenteak.
Erredakzioa
Bere esku balego Tony Hayward BP petrolio konpainiako buruzagia aspaldi kaleratuko lukeela esan du Barack Obama AEBetako presidenteak NBCn egindako elkarrizketan.
Mexikoko Golkoa kutsatu duen petrolio isuria amaitzeko noren "ipurdia ostikatu" behar duen jakiteko adituekin hitz egiten ari dela adierazi du Obamak.
Isuria dela-eta krisia hasi zenetik, apirilaren 20tik, petrolio ihesa gelditzeko neurriak hartu baino gehiago, bilerak egiten aritu dela aurpegiratzen diotenei erantzun nahi izan die Obamak.
BP konpainiako buruzagiaren emaztea
Bestalde, Tony Hayward BPko kontseilari delegatuaren emaztea babesteko segurtasun neurriak areagotu ditu Britainia Handiko Poliziak. Izan ere, familiak mehatxuak jaso ditu petrolio isuria dela-eta.
Maureen Haywarden emaztea mehatxuen jomuga izan da, gaur berak Erresuma Batuko prentsan adierazi duenez. Ekintzaile erradikalek mehatxatu dutela esan du Maureenek.
Britainia Handiko Poliziak jakinarazi duenez, familiaren etxebizitza babesteko operazio bat martxan dago, errepide pribatutik soilik hurbildu daitezkeelako.