Mundua -
Gauez bidaia egin ondoren
Marokon atxikitutako 14 ekintzaileak Kanaria Handian daude dagoeneko
Zapateroren gobernuak ekintzaileek Aaiunen jasotako tratuaren inguruko azalpenak eskatu dizkio Marokori. Bertan egon ziren bitartean, atxikita izan zituzten eta tratu txarrak eman zizkieten.
Erredakzioa
Larunbatean, Sahararen aldeko manifestazioan atxilotutako 14 ekintzaileak Kanaria Handietara iritsi dira gaur. Horietariko 11 Aaiuneko polizia etxean atxikita izan zituzten.
SaharAcciones taldeko ekintzaileak Naviera Armas enpresako itsasontzian egin dute bidaia eta ontziratu bitartean Espainiako ordezkarien zaintzapean izan dira.
Kanarietara 08:30ak aldera iritsi dira, eta ordu laurden beranduago lurrera jaitsi dira itsasontzitik.
Atzo adierazi zutenaren arabera, ekintzaile batzuk Nazio Batuen Erakundeak Mendebaldeko Saharako Erreferendumerako duen misioaren egoitzara joan ziren "Marokoko Poliziak emandako tratu txarrak" salatzeko.
Espainiak azalpenak eskatu dizkio Marokori
14 ekintzaileek Aaiunen jasotako tratu txarrak direla eta, Espainiako Gobernuak azalpenak eskatu dizkio Marokori.
Zapatero presidentea Shanghain dago, Erakusketa Unibertsalak antolatutako Espainiako Egunean parte hartzeko, eta handik Miguel Angel Moratinos Kanpo Arazoetako ministroari oniritzia eman dio marokoarrei argibideak eskatzeko. Ekintzaileak zergatik atxiki eta jo dituzten azaldu beharko dute Rabateko agintariek.
