Rousseff, Brasilgo lehen emakumezko presidentea

Dilma Rousseff, Lularen oinordeko politikoa, izango da Brasilgo presidentea datozen urteetan. Hauteskundeetan 55 milioi botoren babesa jasota adierazi duenez, brasildarrek emandako konfiantzari erantzuteko lan egingo du.

Irribarre urduri batekin esandako lehen hitzetan, Latinoamerikako herrialderik handiena zuzenduko duen lehen emakumea presidentea izatearekin "oso pozik" dagoela adierazi die kazetariei. Brasilian, etxetik ateratzen ari zela, erantzun die Rousseffek kazetarien lehen galderei. Hotel batera joan da gero, presidente hautetsi bezala lehen hitzaldia emateko. Handik Ministerioen plazara bertaratu da; garaipena ospatzeko gosez, 6.000 bat jarraitzaile zain zituen. Langileen Alderdiak antolatutako ospakizunetan parte hartu ondoren, urtarrilaren 1etik Brasil gobernatuko duen emakumea Presidentetzako egoitza nagusira, Avoradako Jauregira, joango da, Luiz Inacio Lula da Silvarekin biltzeko.

Gilberto Carvalho Lularen komunikazio taldeko buruak iragarri duenez, Lula ez da Ministerioen zelaiguneko jaialdian izango, "gaur Dilma Rousseff delako protagonista bakarra".

Lularen ondorengoa

62 urteko ekonomilari eta PT Langileen Alderdiko kideak botoen %55,65 (53 milioi boto) eskuratu ditu. Jose Serra Sozial Demokraziako Alderdiko aurkariak, berriz, botoen %44,35 (42 milioi boto).

Botoen %4,60 zenbatzea falta dela, Serrak ez dauka emaitzari buelta emateko aukerarik, eta, horrenbestez, Rousseff da presidente hautetsia.

Presidentetzarako bidean bigarren porrota du Serrak, 2002an Lulak aurrera hartu baitzion bigarren bozketan. Inkestek bete-betean asmatu dute oraingoan: Rousseffi botoen %55 ematen zioten, eta hamar puntu gutxiago Serrari.