Itxi

Mundua

Errusiaren esku hartzea

Mueller: 'Ezin dut Trump auzipetu, baina ez dut baztertzen delituren bat egin izana'

Agentziak

Errusiak AEBko 2016ko hauteskundeetan esku hartu ote zuten eta Trumpek horretan lagundu ote zuen argitzeko ikerketa amaitu du fiskalak. Orain, Kongresuari dagokio 'impeachment'a abiatzen duen ebaztea.

  • Robert Mueller fiskala.

    Robert Mueller fiskala, agerraldian. Argazkia: EFE

Robert Mueller AEBko fiskal bereziak amaitu egin du bere txostena, eta ondorio nagusiak azaltzeko agerraldia egin du bart. Hilabeteotan ikerketa egin du Errusiak 2016ko hauteskundeetan esku hartu ote zuen eta Trumpek horretan lagundu ote zuen argitzeko. Ondorioztatu duenez, ezin daiteke esan AEBko presidenteak delituren bat egin ez zuenik, baina presidentea auzipetu ezin duela nabarmendu du.

"Karguan den artean presidentea ezin dugu delitu federal bategatik auzipetu. Konstituzioaren kontrakoa da hori. Auzipetzea ez zen aukera bat", argitu du.

Dena dela, honakoa ere erantsi du: "Presidenteak deliturik egin ez zuela baieztatzerik izan bagenu, txostenean jasoko genuke".

Muellerek agiria irakurri du, kazetarien galderak onartu gabe. Txostena apirilean ezagutarazi zuen, baina bart azaldu da komunikabideen aurrean.

Fiskalaren hitzetan, "ez dut presidenteari buruzko balorazio eta ondoriorik egingo".

Robert Muellerrek ez du kazetarien galderarik erantzun agerraldian. Argazkia: EFE

Errusiaren esku-hartzea

Azaldu duenez, "Errusiako Inteligentzia ofizialek eraso antolatu eta adostua egin zuten AEBko sistema politikoaren kontra" eta teknika informatiko "sofistikatuak" erabili zituzten Hillary Clinton hautagai demokrataren kanpainako sare eta ordenagailuak hackeatzeko.

Muellerrek ondorioztatu ahal izan duenez, Errusiako agenteek "informazio pribatua lapurtu eta sarean jarri zuten nortasun faltsuak erabilita eta Wikileaks erakundearen bitartez. Argitalpenek helburu argia zuten: hauteskundeetan eragin eta hautagaitza horri kalte egitea".

Fiskal bereziak esan du esku hartzea egon bazela, eta ikertu behar dela, baina onartu du ez dagoela "froga nahikorik konspirazio zabalago bat egon zela esateko".

Muellerren agerraldia amaitu eta berehala, txioa bota du Trumpek, pozarren. Haren ustez, auzia "itxita" dago. "Ez dago aldaketarik Mueller txostenean. Ez zegoen froga nahikorik, eta halakoetan, gure herrian, pertsona bat errugabea da".


Auzia, Kongresuaren esku

Muellerren txostena mahai gainean, AEBko Kongresuari dagokio orain Trumpen kontrako epaiketa politikoa ('impeachment'a delakoa) abiatzen duen ala ez. Demokratak zatituta daude, prozesuak AEBko 2020ko hauteskundeetan eragin dezakeen beldur.

Elizabeth Warren eta Kamala Harris senatari edota Alexandria Ocasio-Cortez kongresista demokrata 'impeachment'aren aldekoak dira; beste batzuk kontra daude, Trump hauspotu dezakeelakoan.

Kongresuan gehiengoa dute demokratek, eta prozesua abiatuz gero onartu egingo litzateke. Senatuan, ordea, errepublikanoak dira nagusi, eta porrot egingo luke.



  • Bisitatuena

      Kargatzen ikusiena
      Kargatzen ikusiena