Nazionalista eskoziarrek gehiengo absolutu historikoa lortu dute

Eskoziako Alderdi Nazionalistak (SNP ingelesezko siglak) Parlamenturako hauteskundeetan gehiengo absolutu historikoa lortu du, eta horrek bidea ireki dio Erresuma Batuarekiko independentziaren gaineko balizko erreferendumari.

Hauteskunde kanpaina hasieran inkestek laboristen atzetik kokatzen zuten SNP alderdia. Behin bozak zenbatuta baina, 65 eserleku lortu ditu eta beraz, Holyroodeko asanbladan nagusitasuna eman diote.

Azkeneko hauteskundeetan estreinatu zen Eskoziako alderdi Nazionalista; kanpaina independentziaren gaineko erreferendumean zentratu zuten eta gutxiengoarekin sartu zen Gobernuan. Oraingo honetan, ordea, erreferenduma ez da izan alderdiak herritarren babesa lortzeko azpimarratu duen gaia, errekuperazio ekonomikoa eta enpleguaren sorrera, baizik.

David Cameron Lehen ministro britainiarrak dagoeneko zoriondu ditu nazionalistak, eta gogorarazi du eurak izango direla Eskoziako parlamentuaren historian gehiengo absolutua lortu duten lehengoak. Edozein kasutan, "kolaborazioa" egongo dela zin egin duen arren, independentziaren erreferendumaz hitz egiten ari direnei ohartarazi die, "Erresuma Batuaren batasuna mantentzeko kanpaina" egingo duela.