Mundua -
DENBORALEA
Gutxienez 24 pertsona hil dira Japonian Hagibis tifoiaren ondorioz
Gainera, 17 lagun desagertu dira eta 149 zauritu. Oraindik erreskateak egiten ari dira herrialdeko toki askotan, eta ez dute baztertu biktima gehiago egotea.
AGENTZIAK | ERREDAKZIOA
Gutxienez 24 pertsona hil dira eta 149 zauritu Japonian Hagibis tifoiaren ondorioz. Azken hamarkadetan Japonia astindu duen tifoirik indartsuena izan da.
Kanagawa, Tochigi, Gunma, Iwate, Miyagi, Fukushima, Chiba eta Saitamako prefekturetan eragin ditu heriotzak, NHK telebista kateak jakitera eman duenez. Gainera, informazio horien arabera, 17 pertsona desagertuta daude.
Agintariak beldur dira biktima kopuruak gora egingo ote duen. Izan ere, oraindik ere erreskateak egiten jarraitzen dute hainbat ingurutan.
Luiziak eta uholdeak oso zabalduta daude. NHK kateak emandako informazioaren arabera, ipar-ekialdeko 14 ibaik gainezka egin dute, eta 376.000 etxebizitza argirik gabe geratu dira eta 14.000 urik gabe.
Hagibis larunbat gauean iritsi zen Honshura, Japoniako uharte nagusira. Duela hilabete jasandako denborale indartsu batek 30.000 etxetan eragin zituen kalteak.
