Itxi

Mundua

Koronabirusa

AEBn 3.000 pertsona baino gehiago hil dira koronabirusa dela eta

Agentziak | Erredakzioa

New Yorkeko estatua COVID-19ak eragindako pandemiaren epizentroa da AEBn, eta bertan zenbatu dituzte hildako gehien: 1.329.

  • New York hiria, Manhattan.

    New York hiria, Manhattan. Argazkia: EiTB

3.000 pertsona baino gehiago hil dira koronabirusaren ondorioz Ameriketako Estatu Batuetan, Johns Hopkins Unibertsitateak egindako azken balantzearen arabera. AEBn guztira 164.539 pertsona daude kaltetuta.

New Yorkeko estatua COVID-19ak eragindako pandemiaren epizentroa da AEBn, eta bertan zenbatu dituzte hildako gehien, 1.329, aipatutako unibertsitateak bildutako datuen arabera. Hala ere, 50 estatutan, Columbia barrutian eta AEBko beste hainbat lurraldetan baieztatu dituzte kasuak.

Astelehen honetan, 574 pertsona hil dira COVID-19aren ondorioz Ameriketako Estatu Batuetan, hau da, lehen agerraldia izan zenetik egun batean izandako heriotza kopururik altuena, CNN kateak jakitera eman duenez.

AEB da munduan koronabirus kasu gehien dituen herrialdea; gainera, lehena izan da 100.000 metroko langa gainditzen. Atzetik, Italia dago, 101.739 kasurekin.

Italian hil ditu COVID-19ak pertsona gehien, 11.500 baino gehiago. Koronabirus kasu gehien erregistratu dituen hirugarren herrialdea Espainia da (87.956), eta heriotza gehien baieztatu dituen bigarrena da (7.716).

Bestalde, Txinak 81.518 kasu eta 3.305 heriotza baieztatu ditu. Orokorrean, COVID-19aren pandemiak 37.000 pertsona hil eta 777.000tik gora kutsatu ditu.

Kontuan izan osasun agintariek koronabirusaren aurrean eman dituzten aholkuak. Albiste faltsuak zabaldu arren, agintariek emandakoei bakarrik egin kasu. Zalantzarik baduzu edo gaitza hedatu den gune batera bidaian joan ostean sintomarik baduzu, Osasun Kontseiluaren telefonora dei dezakezu: 900 20 30 50 (EAE) eta 948 290 290 (Nafarroa). Gogoratu COVID-19 gaitza ez hedatzeko modurik eraginkorrena eskuak sarri garbitzea dela; ahoa estaltzeko maskarak bakarrik dira gomendagarriak sintomak badituzu edo adineko pertsonekin edo immunodeprimituekin harremanetan bazaude.
  • Bisitatuena

      Kargatzen ikusiena
      Kargatzen ikusiena