Publizitatea
Itxi

2020/07/20

09:16

Mundua

Brusela

Michelek posible ikusten du ituna, baina azken urratsak zailenak direla ohartarazi du

Agentziak | Erredakzioa

Europar Batasunaren goi-bileraren helburua 2021-2027rako berreskuratze-funtsa eta aurrekontua adostea da, eta, horretarako, ahobatezkotasuna behar da.

  • Charles Michel Europako Kontseiluko presidentea.

    Charles Michel Europako Kontseiluko presidentea. Irudia: EFE

  • Whatsapp
  • Whatsapp
  • Telegram
  • Bidali

Charles Michel Europako Kontseiluko presidentearen ustez, litekeena da Europar Batasuneko (EB) buruzagiek pandemiaren ostean ekonomia suspertzeko planari buruzko akordioa lortzea, baina ohartarazi du azken urratsak "zailenak" direla.

"Badakit azken urratsak direla beti zailenak, baina zaila izan arren, garrantzitsua da lanean jarraitzea, uste dut eta ziur nago akordio bat posible dela", adierazi du Michelek Bruselan, goi-bileraren laugarren egunean.

Angela Merkel Alemaniako kantzilerrak eta Emmanuel Macron Frantziako presidenteak, bestalde, adierazi dute "itxaropena" dutela EBko buruzagiek Europako susperraldi funtsari buruzko akordioa lortzeko, baina biek ziurtatu dute ez dela erraza izango, azken orduetan lortutako "aurrerapenak" gorabehera.

Macronek azpimarratu du zenbait aurrerapen "gauzatu" direla "funtsaren zenbateko osoari eta diru-laguntzen zatiari buruzko akordio bat lortzeko", hori baita "azken ordu eta egunetako gairik sentikorrena".

Aurreko hiru jardunaldietan liderren artean egoera "tirabiratsuak" bizi izan direla aitortu du Frantziako presidenteak, eta "zalantzarik gabe oraindik une zailak" biziko dituztela adierazi du. "Baina gai honen inguruko gauzek (funtsaren tamainak eta transferentzien zatiak) aurrera egin dute, eta orain xehetasunetan sartu behar dira", azaldu du.

Buruzagiak gaur bildu dira, goizalde osoa ia 06:00ak arte negoziatzen egon ostean; orduan, Europako Kontseiluko presidenteari beste proposamen bat egiteko eskatu zioten, oraindik irekita dagoen baina 390.000 milioi eurora arteko transferentziak egingo dituen berreskuratze-funtsaren tamaina globalarekin.

Macronek adierazi du Belgikaren proposamen berriak "etorkizuneko europar politika handi bat" bultzatzeko "anbizioari eutsi" behar diola, eta gogorarazi du oraindik beste gai batzuk adostu gabe daudela, hala nola, klimaren baldintzazkotasuna edo Europako aurrekontuak zuzenbide estatuaren errespetuarekin duen lotura.

Era berean, Merkelek nabarmendu du Parisek eta Berlinek elkarrekin egindako lanari esker, "ezohiko egoera honetan beharrezkoak diren funtsezko laguntza batzuk adostu ahal izan ditugu". "Negoziazio zaila izango zela argi zegoen, baina ezohiko egoerek aparteko ahaleginak eskatzen dituzte", nabarmendu du.

"Oztopo horiek gainditu ditugu eta gainerako bidea egitea espero dugu, ez baita erraza izango", azpimarratu du Alemaniako kantzilerrak.

Ostiralean hasi zituzten elkarrizketak, eta bereziki Europa iparraldeko herrialdeen jarreraren ondorioz oraindik akordiorik lortu ez duten arren, igandeko 20 orduko negoziazioek akordiorako bidea ireki dute, iturri diplomatikoen arabera.

Testuinguru horretan, Europar Batasuneko agintariak biltzen diren laugarren eguna da hau, eta EBren historiako goi-bilera luzeenetako eta erabakigarrienetako bat bihurtzeko bidean doa.

Zehazki, ostiral goizean hasi zen bilera Bruselan, eta aurreikusitakoa baino egun bat gehiago luzatu zen, larunbat gauean Herbehereak, Austriak, Suediak eta Danimarkak osatutako taldeak eta gainerako bazkideen arteko desberdintasunak alde batera uztea ezinezkoa zela egiaztatu ondoren.

Atzo, igandea, urrats txikiak eman zituzten balizko akordio baterantz, lau estatu horiei kontzesioak emanez. Alabaina, herrialdeen susperraldi ekonomikoa bultzatzeko zuzeneko laguntzak murrizteko eskaerak eta aurrekontu orokorrari egindako ekarpenean jasotzen dituzten deskontuak handitzeko proposamenak ez dituzte ase.

Negoziazioan orain arte izan dituzten traba nagusiak funtsaren zenbatekoarekin eta diru-laguntzen eta maileguen arteko banaketarekin egon dira lotuta. Horrez gain, laguntza horiek jasotzeko baldintzak ere desadostasun handiak sortu ditu EBko herrialdeen artean.

Charles Michel Europako Kontseiluko presidenteak funtsa 750.000.000 eurokoa izatea proposatu zuen atzo; horietatik, 400.000.000 zuzeneko laguntza gisa emango lirateke, eta beste 350.000.000 kredituetan. Horrek, ordea, Europar Batzordearen hasierako proposamenarekiko diru-laguntzen murrizketa zekarren; izan ere, hasierako proposamen horrek 500.000.000 euro planteatzen zituen transferentzietan eta 250.000.000 euro maileguetan.

Europa iparraldeko herrialdeek, zuzeneko diru-laguntzak ematea saihestu nahi zuten hasieran. Negoziazioak aurrera egin ahala, murrizketa hori ez zuten beharrezkotzat jo, eta arratsaldean funtsa 700.000.000 euroraino murriztea proposatu zuten, erdia laguntza zuzenetan emateko eta beste erdia kredituetan.

Gainera, jasotzen dutena baino gehiago ordaintzeagatik, Europar Batasuneko aurrekontuari urtero egiten dioten ekarpenean dituzten beherapenak handitzea eskatzen zuten, ostiralean Austriari, Danimarkari eta Suediari kuotak igotzea proposatu arren.

Finlandiak ere babestu zuen proposamena, baina gainerako herrialdeek atzera bota zuten. Alemaniak, Frantziak eta Espainiak, besteak beste, uko egiten diote diru-laguntzetan 400.000.000 euro baino gutxiago emateari.

Astelehen honetan, susperraldirako funtsa eta 2021-2027rako aurrekontua adostea dute helburu, baina horretarako, guztiak ados jarri behar dira. Gauzak horrela, beraz, iparraldeko herrialdeek nahi dituzten 350.000.000 euroen eta gainerakoek defendatzen dituzten 400.000.000 euroen artean finkatu dezakete diru-laguntzen zenbatekoa akordioa ahalbidetzeko.

  • Bisitatuena

      Kargatzen ikusiena
      Kargatzen ikusiena
    ;