Itxi

Mundua

KORONABIRUSA

COVID-19aren aurkako txertoa gizakiengan esperimentatzeko faseari ekin dio Italiak

AGENTZIAK | ERREDAKZIOA

Italiako agintariek jakinarazi dutenez, 953 positibo berri izan dira 24 ordutan, eta hildakoen kopurua 35.441 da.

  • Probetan 90 boluntariok hartuko dute parte.

    Probetan 90 boluntariok hartuko dute parte. Irudia: EFE

COVID-19aren aurkako txertoa gizakiengan esperimentatzen hasi da astelehen honetan Italia, Roberto Speranza Italiako Osasun ministroak iragarri duenez, eta, proiektuaren arduradunen arabera, litekeena da dosiak datorren udaberrian saltzen hastea.

Probak Erromako Lazzaro Spallanzani Gaixotasun Infekziosoen Institutu Nazionalean egingo dira, eta horietan 90 boluntariok parte hartuko dute, 7.000 artean hautatuak. Reithera bioteknologia enpresa italiarrarekin batera garatutako proiektuak 5 milioi euroko inbertsioa du, Ikerketa Ministerioak eta Lazio eskualdeak finantzatuta.

"Dena ondo badoa eta esperimentazio hau urtea amaitu baino lehen amaitzen badugu, eta onak eta azkarrak bagara, orduan txerto komertziala datorren udaberrirako izan ahalko dugu; hori da aurreikuspena", azaldu du Francesco Vaia osasun zuzendariak.

Bestalde, erakundeko Giuseppe Ippolito zuzendari zientifikoak zehaztu duenez, 24 aste beharko dira txertoa pertsonengan esperimentatzeko lehen fasea osatzeko, eta, horren ostean, bigarren fasea etorriko da, "horretarako prestatzen ari garena".

"Italia txertoen gerran protagonista da, ez lehena iristeko, baizik eta hobeto iristeko eta herrialdea berdintasun sistema batean jartzeko", adierazi du, eta azpimarratu du txerto propioa izateak "'ni lehena' esaten duten beste herrialde batzuetako esklabo eta morroi ez izatea esan nahi du".

Italia izan zen asteetan zehar gehien zigortutako herrialdea, 2019 amaieran Txinan izan zen pandemiagatik. Gaur egun, kutsatu berrien kopurua goraka doan arren, herrialdea hemezortzigarren postura erori da Johns Hopkins Unibertsitateko zerrendan.

Astelehen honetan, Italiako Gobernuak 953 COVID-19 kasu berri jakinarazi ditu, igandean jakinarazitako 1.210 kasuetatik jaitsiz. Eguneratze horrekin, dagoeneko 260.298 pertsona kutsatu dira Italian pandemia hasi zenetik.

Osasun Ministerioaren arabera, 35.441 pertsona hil dira, aurreko egunean baino lau gehiago, eta ospitaleratutako gaixoak milatik gora dira berriz ere (1.045), horien artean 65 zainketa intentsiboetako unitateetan daudelarik.

Kontuan izan osasun agintariek koronabirusaren aurrean eman dituzten aholkuak. Albiste faltsuak zabaldu dira; beraz, agintariek emandakoei bakarrik egin kasu. Gaitzaren sintomarik baduzu eta EAEn bizi bazara, osasun-zentrora deitu, eta zalantzarik izatekotan, Osasun Batzordearen telefonoa duzu eskuragarri: 900 20 30 50. Nafarroan bizi bazara, berriz, Osasun Batzordearen telefonora dei dezakezu: 948 290 290. Gogoratu COVID-19a ez hedatzeko modurik eraginkorrena eskuak sarri garbitzea dela. Ahoa estaltzeko maskarak derrigorrezkoak dira EAEn uztailaren 16tik, eta Nafarroan, uztailaren 17tik. Iparraldean, berriz, "espazio publiko itxietan" derrigorrezkoa da.
  • Bisitatuena

      Kargatzen ikusiena
      Kargatzen ikusiena