Mundua -
Venezuela
Venezuelako Asanblea Nazionalak premiazko akordio zabal bat sustatu nahi du
Alderdi politiko guztiak prozesuan integratzeko helburua du ekimenak, herrialdeak urte askoan jasan duen krisi estrukturala konpontzeko.
eitb media
Venezuelako Asanblea Nazionalak (AN) batzorde berezi bat sortu du premiazko akordio zabal bat erdiesteko, herrialdeak bizi duen krisi ekonomiko, sozial eta politikoa konpontze aldera.
Jorge Rodriguez ANko presidenteak zuzendutako Elkarrizketa, Adiskidetza eta Bakea lortzeko Batzorde Bereziaren helburua da Parlamentuan diren alderdi guztiekin elkarrizketa sortzea, herritarrak adiskidetzeko eta krisi sakonari amaiera emateko.
Hala ere, chavismoak Parlamentuko eserlekuen % 92 kontrolatzen du, azken bi hauteskundeetan oposizioak deitutako abstentzioaren ondorioz.
Jorge Rodriguezek, ordea, adierazi du batzordea pertsona orori entzuteko prest egongo dela eta eztabaidagarriak diren gai guztiak jorratuko dituela.
Asanblea Nazionaleko presidentearen aburuz, batzordeak oposizioko alderdi eta eragile guztiak deituko ditu elkarrizketara, baita chavismoaren aurkako buruzagi historikoak ere.
Halaber, batzordea larrialdi egoeran izango da etengabe, lanari lehenbailehen ekiteko.