Mundua -
Alemania
Diskriminazioaren amaiera eskatu dute Alemaniako Elizako ehun langile homosexual baino gehiagok
"Beldurrik gabeko Eliza" baten alde egin dute, pertsona horiek bertan LGBTIQ+ pertsona gisa modu irekian bizi eta lan egin ahal izan dezaten, beren orientazio sexualagatik eta genero-identitateagatik kaleratuak izateko beldurrik gabe.
Agentziak | EITB Media
Alemaniako Eliza katolikoko 125 langile homosexualek, apaizak, irakasleak eta administratzaileak barne, LGBTIQ+ pertsonekiko diskriminazioaren amaieraren aldeko aldarria egin dute.
Hala eskatu dute "beldurrik gabeko Eliza" baten alde egiten duen "#OutInChurch" izeneko ekimenaren barruan. Horren bitartez, besteak beste, pertsona horiek Elizan LGBTIQ+ pertsona gisa modu irekian bizi eta lan egin ahal izan dezaten aldarrikatzen dute.
Ildo horretan, Elizaren lan-legedia aldatzea exijitu dute, sexu-orientazioa eta genero-identitatea kaleratzeko arrazoi izateari utz diezaioten. Gainera, "generoari eta sexualitateari buruzko difamazio-adierazpenak" eliz irakaskuntzatik kentzeko eskatu dute.
Halaber, sexualitateari eta generoari buruzko "Elizaren doktrinaren adierazpen zaharkituak" berrikusi egin behar direla azpimarratu dute, betiere "aurkikuntza teologiko eta zientifiko-gizatiarretan oinarrituta".
Gainera, eliza katolikoarentzat lanaldi osoan edo borondatez lan egiten duten LGBTIQ+ pertsona guztiei ekimenarekin bat egiteko deia egin die "#OutInChurch" ekimenak. Era berean, apezpikuei eskatu die publikoki adieraz dezatela iniziatibaren alde daudela.