Europar Batasunak Errusia zigortuko du, eta Estatu Batuek Donetsken eta Luhansken inbertitzea debekatuko dute

Vladimir Putinek Ukraina ekialdean dauden Donetskeko eta Luhanskeko errepubliken independentzia ofizialki aitortu ditu gaur eta gatazka honetan nahasita dauden eragile nagusien gaitzespena eragin du, besteak beste, Ameriketako Estatu Batuena, NATOrena eta Europar Batasunarena.

Etxe Zuriak aurreratu duenez, Joe Bidenek "laster" sinatuko du Donetsk eta Luhansk ekonomikoki zigortzeko agindua. Zehazki, herri horietan edozein jarduera ekonomiko egitea galaraziko zaie AEBko erakundeei, enpresei eta herritarrei.

Europar Batasunak "legez kanpokotzat" jo du Putinek egindako aitortza eta Errusiaren nahiz Donetsken eta Luhansken aurkako zigorrak ezarriko dituztela iragarri dute agiri bateratu betean Charles Michel eta Ursula von der Leyen Europako Kontseiluko eta Europako Batzordeko presidenteek, hurrenez hurren.

Jenst Stoltenberg NATOko idazkari nagusiak ere gaitzetsi du Errusiak emandako urratsa eta ohartarazi du mugimendu horrek "gatazkaren konponbidea oztopatzen" duela.

Bestalde, Emmanuel Macron Frantziako presidenteak adierazi du Errusiak "nazioarteko hitzarmenak urratu" dituela eta "Ukrainako subiranotasunari eraso" egin diola. Testuinguru honetan, Nazio Batuen Erakundeko Segurtasun Kontseilua berehala biltzea eskatu du.