Errusiaren eta Ukrainaren artean bitartekaritza egiteko prest agertu da Txina

Gerra amaitzearen alde lan egiteko Pekinen borondatea azaldu dio Wang Yi Txinako Atzerri ministroak Dimitro Kuleba Ukrainako homologoari.

"Ukrainako subiranotasunaren eta lurralde osotasunaren alde Txinaren babes apurtezina", berretsi du Wangek, Ukrainako Atzerri Ministerioak jakitera eman duenez. Bi ministroek gatazkaren ondorioen inguruan hitz egin dute.

Pekin "gerra diplomaziaren bidez bukatzeko eginahalak egiteko" prest dagoela esan dio Wangek Kulebari. Horretarako, Txina NBEko Segurtasun Kontseiluko kide iraunkorra dela gogorarazi du Atzerri ministroak, Ukrinform albiste agentziaren arabera. Hala ere, iragan astean, Pekin Errusiaren erasoa gaitzesteko ebazpenaren bozketan abstenitu zen.

Bestalde, Txinako Gobernuak Putinekiko markatu nahi izan duen distantzia aitortu dio Kulebak Wangi, nahiz eta azken hilabetean Moskuk eta Pekinek, adibidez, NATO Europako ekialdean zabaltzeari uztea eskatzeko bat egin.