Breivik: 'II. Mundu Gerratik egindako erasorik ikusgarriena izan da'

Anders Breivik ultraeskuindarrak ondokoa adierazi du, joan den uztailean Oslon eta Utoya irlan 77 pertsona hil zituela eta: "Europan, II. Mundu Gerratik gaur arte izan den eraso politiko sofistikatuena eta ikusgarriena burutu nuen".

Epaiketaren bigarren eguna da gaurkoa eta datozen bost egunetan jarraituko du. Breivikek bere burua errugabetzat joko duela espero da.

Erruduntzat joz gero eta buruko arazorik ez duela baieztatzen bada, gehienez 21 urteko kartzela-zigorra ezar diezaiokete. Alabaina, ez dago baztertuta zigorra modu mugagabea luzatzea.

Buruko gaitzen bat duela frogatzen bada, psikiatriko batean sartuko dute eta aldiro-aldiro azterketak egingo dizkiote.

Bestalde, Breivik epaitzen ari den aretoko epaile ez profesional bat kasutik kanpo utzi dute, Facebook sare sozialaren bidez auzipetuarentzat "heriotza-zigorra" eskatu duelako.

Thomas Indreboe epaileak ondokoa idatzi zuen bere Facebook kontuan: "Kasu honetan aukera justu bakarra heriotza-zigorra ezartzea da".