Hollandek Bayrouren babesa jaso eta faborito izaten jarraitzen du

François Hollande Frantziako presidentetzarako hautagai sozialistak François Bayrou zentristaren babesa jaso du ostegun honetan, hauteskundeetako bigarren itzulirako. Hollanderen faborito izaera indartu du horrek, Nicolas Sarkozy kontserbadorearen aurrean.

Sarkozyrekin telebistan izandako eztabaidaren biharamunean eta hauteskundeetako garailea nor izango den jakiteko hiru egunera, Hollandek azken diskurtsoa eman du Tolosan (Frantzia hegoaldean); ezkerrak hiri horretan amaitu ohi ditu kanpainak. Ekitaldia bigarren lekuan geratu da, baina, sozialistak Bayrouren babesa izango duela jakinda.

Eskuinarekin aliatuta egon ohi den zentristak "erabaki pertsonala" dela esan du eta haren boto emaileei ez die gauza bera egiteko eskatu.

Bayrouk bosgarren amaitu zuen presidentetzarako bozen lehenengo itzulia, apirilaren 22an, 3,2 milioi boto baino gehiagorekin (% 9,3).

90eko hamarkadaren hasieran Gobernuan Sarkozyrekin batera izan zen arren, Bayrouk hari botoa ematearen aurka egin du, "eskuin muturrera egin baitu".