Mundua -
Arkeologia
Zahi Hawass arkeologia zentroak Bilbon ireki du Europarako eta Latinoamerikarako egoitza
Zahi Hawass munduko arkeologo prestigiotsuenetakoa da. Bilbon ireki duten nazioarteko egoitzan hainbat ekimen antolatuko dituzte.
AGENTZIAK | EITB MEDIA
Zahi Hawass egiptologo ezagunaren nazioarteko arkeologia zentroak Bilbon ireki du Europarako eta Latinoamerikarako egoitza.
Inaugurazioa dela eta, Zahi Hawass Bilboko udaletxean izan da goizean eta Juan Mari Aburtu alkatearekin bildu da, elkarlanean aritzeko aukera aztertzeko.
Arkeologo ospetsuak hitzaldi bana eskainiko ditu gaur eta bihar Gasteizko Europa Jauregian eta Iruñean, Nafarroako Medikuen Kolegioko Aretoan.
Aurrerantzean, Bilboko egoitza berria Mohamed Ezzeddinek zuzenduko du eta hainbat jarduera antolatuko dituzte bertan unibertsitateekin eta kultur elkarteekin batera, hala nola, hitzaldiak, erakusketak, Historiako ikasleentzako ikastaroak edo arkeologiari buruzko kongresuak.
Zahi Hawassek hamarkadak daramatza Egipto Zaharra ikertzen eta bere ibilbidean hainbat aurkikuntza egin ditu. 32 lan argitaratu ditu. Egun, mundu zabalean sakabanatuta dauden Egipto Zaharreko objektuak eta materialak herrialde horretara bueltatzeko mugimendu bat bultzatzen ari da.
