Mundua -
Ukrainako gerra
Errusiak Ukrainan borrokatzen ari diren indar militarren burua ordezkatu du
67 urteko Valeri Gerasimov Errusiako Armadako Estatu Nagusiko egungo buruzagiak Sergei Surovikin jenerala ordezkatuko du.
Agentziak | EITB Media
2022ko otsailetik Ukrainan borrokan ari diren indar militarren komandantea ordezkatu du gaur Errusiak, eta Valeri Gerasimovek, Errusiako Armadako Estatu Nagusiko egungo buruak, hartuko du kargu hori.
67 urteko Gerasimovek Sergei Surovikin jenerala ordezkatuko du, zeinak azaroan gomendatu zuen errusiarrek Ukrainako Kherson eskualdearen iparraldetik erretiratzea, tropa errusiarrek gatazkan jasan duten porrotik handiena.
Sergei Shoigu Defentsa ministroaren aginduz, Surovikin izango da hemendik aurrera "operazio militar bereziaren" zonaldeko tropen taldeko buruzagiordea.
Surovikin, Sirian borroka esperientzia duena, Aire Armadako burua da jada. Ukrainako indar errusiarren beste buruzagiordea Oleg Saliukov izango da, Lurreko Armadako komandantea, eta Alexei Kim, Indar Armatuen Estatu Nagusiko buruzagiordea.
Joan den urteko uztailaren hasieran Lisichansk herria hartu zuenetik, Errusiako Armadak hainbat porrot jasan ditu, hala nola Kherson, baita eskualdeko hiriburua ere, eta Kharkiv eskualdearen zati bat.
Hala ere, une honetan, tropa errusiarrak eta Wagner konpainia militar pribatuko unitateak Donetsk eskualdeko Soledar herriko kaleetan borrokatzen ari dira.
Gotorleku horren konkista, urte erdi baino gehiagoan errusiarren lehen garaipen handia izateaz gain, bidea erraztuko luke Bajmut erasotzeko, Donbasseko gotorleku nagusietara daraman bidegurutze garrantzitsu bat.