Mundua -
Estatu Batuak
Bidenek armen erabilera mugatzeko eskatu du, hainbat indarkeria gertakariren ostean
Presidente estatubatuarrak azken egunotan izandako hainbat erasori buruz hitz egin du, besteak beste, Alabamako urtebetetze festa batean izandako sarraskiari buruz. Herrialdeak gutxienez 162 tiroketa masibo jasan ditu aurten.
Agentziak | EITB Media
Ameriketako Estatu Batuetako presidenteak armen erabilera murrizten duten legeak onartzeko eskatu dio berriro Kongresuari igandean, hainbat indarkeria gertakari izan ostean, besteak beste, urtebetetze festa batean sarraskia gertatu eta gero.
"Zertara iritsi da gure nazioa haurrek urtebetetze festa batera beldurrik gabe joaterik ez dutenean, gurasoek kezkatu egin behar dutenean seme-alabak eskolako atetik, zinemara edo parkera ateratzen diren bakoitzean?", galdetu zuen Bidenek ohar batean.
Bidenek mezu hori bidali zuen Dadevilleko (Alabama, AEBko hego-ekialdea) nerabe baten urtebetetze festan larunbat gauean izandako tiroketa baten ondorioz gutxienez lau pertsona hil eta hamar baino gehiago zauritu zirela jakin eta ordu batzuetara.
Argitzeke daude oraindik gertakari horren nondik norakoak, baina Louisvilleko (Kentucky) parke batean gutxienez bi pertsona hil eta lau zauritu zituzten egun berean gertatu zen.
Hiri horretan bertan, astelehenean bost pertsona hil eta zortzi zauritu ziren, tartean bi polizia, banku batean izandako tiroketan.
"Su armak dira haurren heriotza kausa nagusia Estatu Batuetan, eta zenbakiak handitzen ari dira, ez gutxitzen", gaineratu du presidenteak.
Bidenen hitzetan, prest dago "bizitzak salbatuko dituen legedi federalean fede onez lan egiteko", eta nabarmendu du "Kongresuaren boterearen barruan" dagoela honako arauak ezartzea: "su armak modu seguruan gordetzea, arma salmenta guztietarako aurrekariak egiaztatzea, arma fabrikatzaileen erantzukizun immunitatea ezabatzea eta eraso arma zein gaitasun handiko kargagailuak debekatzea".
AEBn gutxienez 162 tiroketa masibo izan dira aurten, Gun Violence Archive erakundeak jaso duenez. Horren esanetan, lau pertsona edo gehiago hiltzen direnean jotzen dituzte tiroketa masibotzat, erasoaren egilea barne hartu gabe.