Aita Santua, sexu-abusuen inguruan: "Elizak egindako kaltea konpontzeko unea da"

Elizaren barruan izandako sexu-abusu kasuak behin betiko argitu eta egindako kaltea konpontzeko ordua dela esan du gaur Frantzisko aita santuak. "Sexu-abusuen inguruan elizak egindako kaltea konpontzeko unea da, bai aurreko belaunaldiei egindakoa, baita oraingoei egindakoa ere", adierazi du.

Adin txikikoen babeserako Vatikanoak 2014an sortu zuen batzordeak batzar orokorra egin du, eta bertan hitz egin du Frantziskok. Ikusmin handia zegoen haren hitzaldia entzuteko, bereziki, Hans Zollner jesuita alemaniarrak, elizak egindako sexu-abusu kasuak ikertzen lanik gehien egin duenetako batek, aipatutako batzordearen "gardentasun eza" salatu eta komisio hori utzi ondoren.

"Elizak eredugarri" izateko lan egin behar duela nabarmendu du Frantziskok, eta bide horretan, "zuzenak ez diren jokabideak zuzentzeko" neurriak hartzea eskatu du.

Hala, txosten bat egiteko eskatu die adin txikikoen babeserako batzordekideei, kalteak konpontzeko proposamenak eginez. Azken sei hilabeteotan "asko" egin dela nabarmendu du, baina "gehiago" egin daitekeela ere bai.

Eskaini duen hitzaldi luzean, Aita Santuak esan du "Eliza Katolikoak parez pare duen erronka nagusia" adin txikikoei egindako sexu-abusuen gaiari aurre egitea dela.