CAN auzian erantzukizunak eskatu ditu ezker abertzaleak

Nafarroako Kutxan jazotakoa argitzeko eta erantzukizun penal eta politikoak eskatzeko "ikerketa sakona" eskatu du Txelui Moreno ezker abertzaleko bozeramaileak, gertatutakoa ezin daitekeelako "lurperatuta geratu". Iruñean eskainitako prentsaurrekoan Maitane Intxaurra ere izan da.

Yolanda Barcinak Nafarroako Kutxako gobernu organoak "kolpe batez" disolbatu eta fundazioaren estatutu berriak egiteko batzorde kudeatzaile bat "apetaz" aukeratu ostean, "ordezkari politiko baten erabakia baino, kazike baten jokaera" dirudiela salatu du Morenok.

"Nafarroako Parlamentuaren ezkutuan erabaki honen asmo iluna zein izango ote den galdetzen diot nire buruari", esan du Morenok.

Demokraziaren aurkako izaera

"Nafarroako Kutxako estatutuek duten demokraziaren aurkako izaera salatu du beti ezker abertzaleak", azpimarratu du Morenok, "ezker abertzalea bera gobernu-organotik kanpo uzteko asmoz".

Bestalde, CANen jazotakoa eta Santiago Cervera diputatu ohiaren eta Jesus Pejenaute kontseilari ohiaren auziak argitzeko ikerketa-batzordeak sortzea errefusatu dute UPNk eta PSNk. "Gertatutakoa, kudeaketa okerra eta milioi askoko inbertsioak lurperatu nahi dutela erakusten du horrek", salatu du Morenok.