Mintegi: 'Alde handia dago EAJren hitzaldiaren eta jarreraren artean'

Laura Mintegi EH Bilduko bozeramaileak esan du EAJren akordiorako eskaintza eta jeltzaleen jarrera ez datozela bat. "EAJren hitzaldiaren eta praktikaren artean alde handia dago. Akordioak eskatzen dituzte, baina ez dute akordio horiek lortzeko pausorik ematen", adierazi du.

Legebiltzarrean egindako agerraldian, Mintegik esan du EH Bildu koalizioak ez duela harremanik EAJrekin. Jeltzaleek euren proposamenak "lehenbailehen" helarazi behar dizkietela iritzi dio Mintegik. Horren hitzetan, "aurreko hartu-emanik gabe", akordioa ezinezkoa izango da.

Urkulluren Gobernuak eta EAJk proposamenak mahai gainean jarri behar dituzte, oposizioko taldeek horiek aztertzeko denbora izan dezatean, gaineratu du. "Ezinezkoa da ezerezaz akordioak ixtea", gaineratu du.

"Aurrekontuen eta beste gaien inguruan proposamenak lehenbailehen aurkeztea espero dugu. Zer egin nahi duten jakin nahi dugu, ekarpenak egin ahal izateko eta hitzarmenak bilatzeko".

Legebiltzarrean bakeaz eta elkarbizitzaz arituko den batzordeaz ere hitz egin du Laura Mintegik. EH Bildu batzorde horretan egon egongo dela ziurtatu du, baina orain arte batzorde horrek egindako lana hemendik aurrera egin beharrekoaren oinarri gisa hartu gabe.

Aurreko legealdiko lantaldea "hankamotz" jaio zela uste du EH Bilduko bozeramaileak. Eusko Legebiltzarrean gaia lantzeko sortuko den lantaldeak hori kontuan izan beharko duela adierazi du.

Hain zuzen ere, jarrera hori defendatuko du datorren ostegunean, gaia osoko bilkuran eztabaidatzen dutenean. PSE-EEk egingo du lantaldea osatzeko proposamena, aurreko oinarrietatik abiatuta hasi nahi du lanean, eta iritzi berekoak dira gainerako taldeak.