'Afiliatuek aukerarik onena aukeratu dezaten' espero du Barcinak

Yolanda Barcina UPNko presidente eta kargu hori berriz ere betetzeko hautagaiak "partehartze altua" espero du alderdi horrek martxoaren 17an Iruñean egingo duen Kongresuan. Biltzar horretan alderdiko presidentzia egongo da jokoan, eta Barcinak Alberto Catalan izango du parez pare. Hori dela eta, "afiliatuek aukerarik onena aukeratu dezaten" espero du Barcinak.

Akordiorik lortu ez ostean, Barcinak eta Catalanek hautagaitza bakoitza aurkeztu dute alderdi nafarreko presidentzia lortzeko. Dena den, eta oraingoz akordio hori urrun dagoela dirudien arren, Barcinak ez du aukera hori baztertzen, " beti baitago akordiorako margina bat, Kongresu ostean ere bai", azpimarratu du.

Barcina, "intentsitate askorekin"

"Azken orduak intentsitate askorekin" bizi izan dituela onartu du Barcinak,  "UPNren eta Nafarroaren alde lan egiteko ilusioarekin baitnago". Gainera, UPN "alderdirik demokratikoena" dela nabarmendu du, "zerrenda guztiak irekiak baitira. Oso alderdi bizia da, eta argi erakusten ari gara", gaineratu du.

"Kongresu honetan partehartzea oso altua izango da, aspaldian ez baitugu hainbeste hautagai izan" azpimarratu du.

Catalanek "talde bikaina" dauka

Alberto Catalan UPNko presidenteorde eta alderdi horretako presidentziarako hautagaiak UPNen hausturarik ez dagoela adierazi du. Horrez gain, bikaintzat jo du Kongresurako prestatzen ari den lan-taldea.

"Oso lan-talde ona izango da, jende jatorraz, ilusioz betetakoaz, hurbilaz, arduratsuaz,...betetakoa. Hezkuntza, osasungintza eta nekazaritzako sektoreetako jendea izango du, baina batez ere UPN eta Nafarroa maite dutenez osatuta egongo da, hori baita momento hauetan garrantzitsuena", gaineratu du.