Adiskidetzerako keinu bat egiteko eskatu dio EAJk Rajoyri

Aitor Esteban EAJk Kongresuan duen bozeramaileak "adiskidetzerako keinuren bat" egiteko eskatu dio Rajoyri, "gainetik egon arren"; izan ere, "mozorrotu nahi badute ere, ETArena errendizioa izan da", esan du.

Euskal eskumenak zokoratu nahi badituzte, "aurrean" egongo direla ohartarazi dio Gobernuari, eta ondorioz, "harreman ona gaiztotu" daitekeela esan du.

Bestalde, Kongresuan dauden alderdiek Konstituzioari "buelta bat emateko" aukera aintzat hartu dutela nabarmendu du, "legegintzaldi honetan bertan has daitekeen eginkizuna".

Halaber, EAJk Kongresuan duen bozeramaileak PPri eta PSOEri esparru politiko berri bat negoziatzeko eskaera egin die.

Konstituzioaren aldaketa "etorkizunean begiztatzen" dela ziur dago Aitor Esteban eta era horretan, Euskadik eta Kataluniak Espainiarekin duten harreman berria ezarriko dela uste du.

Konstituzioaren egungo eskema "zalantzan" jarri daiteke eta lurralde errealitatearekin bat egiteko berritu egin behar dela uste du Estebanek.

Ez du eztabaidarentzat data zehatzik jarri, baina "etorkizunean begiztatzen" dela esan du.

Horren iritziz, "krisi ekonomikoak eta erakunde batzuetako gehiegikeriak ahultasun sentsazioa sorrarazi dute, eta ondorioz, Konstituzioa eraldatzeko beharra gomendatzen da".

Horregatik, Konstituzioa aldatzeko eskaera egin die PPri eta PSOEi, euren botoak horretarako beharrezkoak baitira, eta Euskadiko eta Kataluniako burujabetzarako eskakizunei erantzuteko esparru politiko berria negoziatzeko eskatu die.