Politika -
Koordinakundea desegingo da
Bakearen Aldeko Koordinakundearen ekarpena eskertu dute alderdiek
ETAren aurkako borrokan Koordinakundeak izandako papera azpimarratu du Euskadiko alderdi politikoek. Koordinakundeak desegiteko azken batzarra egin du gaur.
Erredakzioa
ETAren terrorismoaren aurkako borrokan Bakearen Aldeko Koordinakundeak egindako lana aitortu eta eskertu dute euskal alderdi politikoek. Larunbat honetan desegiteko azken batzarra egin du Koordinakundeak.
EAJ
Joseba Egibar EAJren legebiltzarkideak Radio Euskadin eskainitako adierazpenetan esan duenez, Koordinakundeak "ibilbide luzea izan du herritarren giza eskubideen defentsaren alde". Halaber, "politika arloan, oso baldintza txarretan lanean aritu izana" azpimarratu du. Ondorioz, "egindako bidea" eskertu du.
EH Bildu
Oskar Matute EH Bilduko legebiltzarkideak, berriz, Bakearen Aldeko Koordinakundeari "miresmena" diola esan du. "ETAren indarkeriazko ekintzak salatu zituen, eta desegitea erabaki badu, horrek esan nahi du, logikari jarraituta, ETA mehatxua izateari utzi diola".
PSE
Jose Antonio Pastor PSEko legebiltzarkideak ere egindako lana eskertu dio Koordinakundeari. "Euskal gizarteak beldur handia zuenean hasi zen lanean, eta horrek hainbat kontzientzia esnatu zituen", esan du, "kalera irteteko animatu gintuen ahots ausarta izan zen Koordinakundea".
PP
Bestalde, Laura Garrido PPko legebiltzarkidearen hitzetan, Koordinakundeak "kontzientziak astindu" ditu, eta "ETAren biktimen inguruko hainbat aurreiritzi suntsitzen lagundu zuen".
