Politika -

CAN auzia

Enrique Goñi CANen zuzendari ohia inputatu dute dieten auziagatik

Mari Paz Benito epaileak inputatu gisa deklaratzera deitu du maiatzaren 24rako, helegitea atzera bota eta biharamunean. Goñiren inputazioa gertaera logikotzat jo du Kontuz elkarteak.

Enrique Goñi CANen zuzendari ohia. Argazkia: EITB
Enrique Goñi CANen zuzendari ohia.
Enrique Goñi CANen zuzendari ohia inputatu dute dieten auziagatik

1:19

Erredakzioa

Whatsapp Facebook Twitter Telegram Email

CANeko dieten auzia ikertzen ari den epaileak Enrique Goñi Nafarroako Kutxaren zuzendari ohia inputatu gisa deklaratzera deitu du maiatzaren 24rako, Nafarroako Justizia Auzitegi Nagusiak jakitera eman duenez. Goñiren inputazioa gertaera logikotzat jo du Kontuz elkarteak.

Epaileak Nafarroako Kutxan ustez jasotako dieta bikoitz eta hirukoitzengatik inputatu duen laugarren pertsona da Goñi, Miguel Sanz Nafarroako Gobernuko presidente ohiaren, Enrique Maya Iruñeko alkatearen eta Alvaro Miranda Ekonomia eta Ogasun kontseilari ohiaren atzetik.

Azken hiru horiek, UPNko buruzagiak hirurak, dagoeneko deklaratu dute Maria Paz Benito epailearen aurrean, eta itzuli dituzte Nafarroako Kutxaren Erakunde Fundatzaileen Batzorde Iraunkorrean jasotako dietak.

Nafarroako Auzitegiak Sanzen eta Goñiren helegiteak atzera bota eta biharamunean iritsi da inputazioa.

Aurreko martxoaren 20an, epaileak ez zuen onartu auzia Auzitegi Nazionalaren esku uztea, dieten auzian hain zuzen ere.

Hala ere, onartu egin zuen Kontuz!ek eta UPyDk Banca Civicako (CAN, Caja Burgos, Caja Canarias eta Caja Sol) kontseilari ordezkarien kontra jarritako salaketa Madrilgo auzitegiak aztertzea.

Goñiren inputazioa logikotzat jo du Kontuz elkarteak

Enrique Goñi Nafarroako Kutxaren zuzendari ohiaren inputazioa, prozesuaren jarraipen logikoa izan dela adierazi du Kontuz elkarteak.

Javier Ayestaran Kontuz elkarteko ordezkariak Maria Paz Benito Iruñeko 3. instrukzio auzitegiko epailearen lana goraipatu du. Horren iritziz, lan profesionala egin du kasuko epaileak.

"Guk argi genuen prozesuaren jarraipen logikoaren baitan sartzen zela Goñiren inputazioa eta epaileak ere horrela ulertu du", adierazi du. Nafarrek ere iritzi bera dutela uste du Ayestaranek.

"Dieta opaku horien arduradun gisa, Goñik ordainketa horien gaineko azalpenak eman beharko ditu. Azaldu beharko du Nafarroako Gobernuak CANeko funtzionamenduaren beste alderdi batzuk ez ikertzeko ezarri zituen dieta horiek", gaineratu du.

Ayestaranen ustez, hori da argitu behar dena. "Dietak Nafarroako Gobernuaren ikuskaritza saihesteko ezarri bazituzten, eroskeria delituaz hitz egiten ariko ginateke", gaineratu du.

Hau zure interesekoa bada, baliteke beste gai hauek ere izatea