Alternatibak Organo Exekutiboa aukeratuko du larunbatean

Alderdiaren Batzar Orokorra egingo du datorren larunbatean Alternatibak. EH Bildu koalizioaren barruan dago Alternatiba eta larunbateko bileran Organo Exekutibo berria aukeratzeaz gain, 2015eko Europako Parlamenturako hauteskundeetan koalizioaren barruan aurkeztuko den edo ez erabakiko du.

Batzarrean alderdiko 200 kide baino gehiagok parte hartu ahal izango dute modu zuzenean. Koordinakundea osatzeko hautagaitzak ere aurkeztu ahal izango dira. Oraingoz, bost emakumek eta lau gizonezkok osatutako hautagaitza aurkeztu da.

Hautagaien artean Diana Urrea EH Bilduko legebiltzarkidea dago. Oskar Matute alderdiko bozeramailea, berriz, ez da azken hiru urteetan gertatu bezala, Organo Exekutiboko kide izango.

Bileran 2015eko Europako Parlamenturako hauteskundeen inguruan ere hitz egingo dute. Alderdiak haustekunde horietara EH Bildu koalizioaren barruan aurkeztu edo ez erabakiko du.

Larunbateko Batzarrean murrizketen, erreformen eta langileria jasaten ari den "erasoen" aurrean "etengabeko mobilizazioa indartzearen" aldeko deia egingo du Alternatibak. "Erasoen aurrean giza harresia sortu behar dugu, etxean isilik geratzen den gehiengoari buruz hitz egiten dutenen nahigaberako egin behar dugu", adierazi du Matutek bileraren aurkezpenean.

Bozeramaileak azaldu duenez, goreneko organoa da Batzarra, baina ezin da beste alderdiek egiten dituzten kongresuekin alderatu. "Alternatibak urtean modu honetako bi bilera egiten ditu eta jarraitu beharreko bide politikoa zehazten da horietan", esan du. Hori dela eta, larunbateko bileran exekutibo berria hautatu arren, ez da batzorde politikoa zehaztuko.