Herrirari harrerarik egin ez diola argitu du Garitanok

Herrirari egindako ustezko harreraren inguruan Carlos Urquijo Espainiako Gobernuko EAEko ordezkariak zabaldutako informazioa "faltsua" dela esan du Martin Garitano Gipuzkoako ahaldun nagusiak. Hain zuzen ere, Herrirari harrerarik egin ez diola azpimarratu du Garitanok, eta azken polizia operazioan atxilotutako bi herritar baino ez dituela hartu azpimarratu du. Ildo horretan, "obsesioak ez direla onak" jakinarazi dio Urquijori.

Izan ere, Espaniako Gobernuko ordezkariak Auzitegi Nazionaleko Fiskaltzari harrera horren berri eman dio, Garitanok "desobedientzia delitua" egin ote duen azter dezan.

Esan bezala, Herriraren kontrako operazioan atxilotutako Nagore Garciarekin eta Jesus Mari Aldunberrirekin izan da goizean Martin Garitano, operazio horren gaineko informazioa jasotzeko. Atxiloketak izan ziren egunean ere Hernanin egon zen Gipuzkoako ahaldun nagusia, han jazotzen ari zena hurbiletik ezagutzeko.

Horrekin lotuta, Garitanok argi utzi du operazioa izan zenean Gobernuko ordezkariaren erantzunaren zain gelditu zirela, baina oraindik ez dutela inolako azalpenik jaso. Garitanoren esanetan, "horregatik elkartu dira gaur Garciarekin eta Aldunberrirekin, operazioan gertatu zena eta aurrerantzean gertatuko dena ezagutzeko".