Politika -
Polemika Kongresuan
Saenz de Santamaria: 'Ez dut nire bizitza putan gainsoldatarik jaso'
Azken urteetan ia 600.000 euroko gainsoldatak jasotzea leporatu dio Soraya Rodriguez bozeramaile sozialistak Gobernuko presidenteorderi Diputatuen Kongresuan.
Erredakzioa
PPren diru beltza jaso duenik irmo ukatu du Soraya Saenz de Santamaria Gobernuko presidenteordeak: "Nire bizitza puta guztian ez dut gainsoldatarik jaso", ziurtatu du. Azken urteetan ia 600.000 euroko gainsoldata jasotzea leporatu dio Soraya Rodriguez bozeramaile sozialistak Gobernuko presidenteorderi.
"Ez dut sekula gutun-azalik kobratu", azaldu du presidenteordeak Kongresuko kontrol saioan. Miguel Arias Cañete Nekazaritza ministro ohiak atzo Ministroen Kontseiluko prentsaurrekoa Europako hauteskundeetara begira kanpaina egiteko erabiltzea kritikatu du Rodriguezek.
Gainera, Arias Cañeteren eta presidenteordearen "B kutxak" eta "gainsoldatak" azaltzeko eskatu dio diputatu sozialistak Gobernuari.
Ministro ohiaren gainsoldatak 300.000 euro baino gehiagokoak direla salatu du Rodriguezek. Saenz de Santamariak azken urteetan ia 600.000 euroko gainsoldatak jaso dituela ziurtatu du PSOEko bozeramaileak.
Abortua eta Justizia Unibertsala
Bestalde, Europako hauteskundeen aurrean abortuaren erreforma eten duenik ukatu du Alberto Ruiz-Gallardon Justizia ministroak. Estatuko aholkulariek egin behar dituzten txostenen zain daudela ziurtatu du ministroak.
Gainera, Justizia Unibertsalaren erreformak zigorgabetasuna ekarri duenik ukatu du Gallardonek, nahiz eta azken egunetan 30 bat droga-trafikatzaile aske geratu. Erreformaren aplikazioarekin eskumenak dituen auzitegiak gaizkileak epaituko ditu, ministroaren hitzetan.
