Politika -
Auzitegi Gorenaren ebazpena
Goiriena eta Barranquero kargutik kendu ditu EHUk
Diru publikoa bidegabe erabiltzea eta dokumentuak faltsutzea egotzita, kartzela zigorra eta lan publikoan aritzeko debekua ezarri zien Gorenak bi irakasleoi.
Erredakzioa
Javier Goiriena de Gandarias eta Montserrat Barranquero EHUko Estomatologia alorreko irakasleak kargutik kendu ditu Euskal Herriko Unibertsitateak. Auzitegi Gorenaren ebazpenaren ondotik etorri da EHUren neurria: diru publikoa bidegabe erabiltzea eta dokumentuak faltsutzea egotzita, kartzela zigorra eta lan publikoan aritzeko debekua ezarri zien Gorenak bi irakasleoi.
Bizkaiko Lurralde Auzitegiak zigorraren irmotasuna berresteko oharra igorri dio EHUri, eta, hala, behin betiko bertan behera utzi dute Goirienaren eta Barranqueroren funtzionario izaera.
Auzitegiaren jakinarazpena jaso eta berehala ekin dio EHUk legea betetzeko prozedura abian jartzeari. Hala, Errektoretzak ebazpen bat kaleratu du, Goirienak eta Barranquerok funtzionario izaera galdu dutela jakinaraziz.
