Politika -
Auzitegi Nazionala
Bi urteko zigorra Preciado eta Martinezentzat auzia 'luzea' izategatik
Zigortutakoek lehergailu bat jarri zuten Iurretako subestazio elektrikoan. Auzia geldirik egon da 2005etik; hori dela eta, zigorra arinagoa izan da.
Erredakzioa
Auzitegi Nazioanalak bi urte eta egun bateko kartzela-zigorra ezarri die Jon Kepa Preciado eta Gorka Martinez Azkarazo ETAko kideei Iurretako (Bizkaia) subestazioan lehergailu bat jartzeagatik.
Ebazpena egiterako orduan, prozesua "neurriz kanpo" luzatu izana kontuan hartu dute, zazpi urte eta erdiz "geldirik" egon baita auzitegietan.
Zigor Arloko 4. sekzioko Aretoaren iritzian, kalte terroristak egin zituzten biek, baina aringarritzat jo du auzia behar baino gehiago luzatzea. Gainera, 13.669 euroko kalte ordaina Iberdrolari ematea agindu die.
Epaian Angela Murilloren txostena jaso dute; horren arabera, auzia geldirik egon da 2005eko maiatzaren 11tik, alegia, Martinez Azkarazoren deklarazioa hartu zutenetik, 2013ko urtarrilaren 21era arte, Frantziak Auzitegi Nazionalak eskatutako agiria bidali zionean. ANk Jon Kepa Preciadoren idazki bat bidaltzea eskatu zuen.
Epaiak, hortaz, frogatutzat jo du akusatuek Iurretako subestazio elektrikoan lehergailu bat jarri zutela, 2003ko ekainaren 19an. Bonbak kalteak eragin zituen eraikineko kanpoaldean eta kontrolerako ekipoetan.