Itziar auzo-udal izateko babesa ematea eskatu die EAk bere zinegotziei

Pello Urizar EAko idazkari nagusiak Debako tokiko exekutiboari baimena kendu dio, eta Itziar Debako auzo-udal bihurtzearen aldeko boza ematea eskatu die EAko Debako zinegotziei.

Debako EAko zuzendaritzak atzo jakinarazi zuenez, datorren astearteko Udaleko osoko bilkuran, EAko zinegotziek Itziar auzo-udal izatearen kontra bozkatzeko asmoa zuten. Urizarrek erabaki horri balioa kendu dio, eta aldeko botoa emateko exijitu du. EAko idazkari nagusiak azaldu duenez, batzar nazionalak gai honi buruzko ebazpen proposamen adostuko du. Halaber, baliteke tokiko entitate txikiaren aldeko botoa ematen ez dutenei zigorra ezartzea.

Gainera,, zinegotzi horien abstentziorik ez duela onartuko aurreratu du Urizarrek, nahiz eta hori jazota ere, Itziar auzo-udal bihurtuko zen. Izan ere, aldeko botoa eskatu du alderdiaren "oinarriei" jarraituta.

Urizarrek gogoratu duenez, maiatzaren 25ean herri-galdeketa egin zuten Gipuzkoako udalerri horretan, eta auzokideen % 97 Itziar auzo-udaltzat jotzearen alde agertu ziren.

Udalaren osoko bilkurak "zuzeneko demokraziaren bitartez euren borondatea adierazi dutenen desioa bermatu behar du", gaineratu du Urizarrek.