Politika -
AHTren obrak
EH Bilduk neurriak har ditzazke zementu fabrika ilegalen inguruan
Koalizioak "erabateko iruzurra" egitea leporatu dio Eusko Jaurlaritzari, eta Oregi sailburuari gaiaren inguruko adierazpenak ahalik eta azkarren emateko eskatu dio.
Erredakzioa
EH Bildu Eusko Jaurlaritzaren eta Ana Oregi Ingurumen sailburuaren aurkako lege neurriak hartzea aztertzen ari da, Abiadura Handiko Trenaren eraikuntza lanetako "legez kanpoko" zementu fabriken "iruzurra" dela eta.
Donostian eskaini duten prentsaurrekoan, Marian Beitialarrangoitia eta Oskar Matute EH Bilduko parlamentariek "eskandalua" argitzeko eskatu dute. Haien aburuz, azpiegitura horien lanek erakusten dute "onurak dituzten bakarrak guztion diruarekin aberasten ari diren alderdi eta enpresak" direla.
AHTren proiektuaren "larrialdiko" luzamendua eskatu dute, eta Eusko Jaurlaritzari zementu fabrika ilegalen "iruzurra baimentzea eta bultzatzea" leporatu diote. Izan ere, fabrika horiek ez daude eraikuntza proiektuan txertatuta, eta "mozkinen marjina handitzeko aukera" ematen dio Gobernuari, "inongo lizentziarik gabe erdi prezioan egindako zementua merkatuko prezioan salduta".
"Eusko Jaurlaritzak udalak ezikusiarena egitera eta ekintza irregularrei babes legala ematera bultzatzen eta behartzen ditu", salatu du EH Bilduk.
Horren harira, EAJren Gobernuak "erabateko iruzurra, zementua prezio bikoitzean erosita herritarren dirua bidegabe erabili eta, gaiaren inguruko epaiak ahantzita, udalak legez kanpoko ekintzak egitera behartu" ote dituen galdetu dute parlamentariek.
Horregatik, Ana Oregi Ingurumen sailburuari gaiaren inguruko azalpenak berehala emateko eskatu diote, eta Gobernuak zergatik uzten duen "legez kanpoko ekintzak egiten eta guztion kontura enpresak aberasten" argitzeko exijitu diote.
