Politika -
Elkarrizketa Radio Euskadin
Marfany (ANC): 'Konstituzionalaren erabakia demokraziaren aurkakoa da'
Kataluniako Asanblada Nazionaleko presidenteordearen hitzetan, "kontsulta posible da". Gainera, Masek "atzera egingo ez" duela ziurtatu du Marfanyk.
Eriz Lotina | eitb.com
Jaume Marfany Kataluniako Asanblada Nazionalaren (ANC) presidenteordeak salatu duenez, Auzitegi Konstituzionalak kontsulta bertan behera uzteko hartu duen erabakia "demokraziaren aurkakoa" da. "Bozkatzeko eskubidea dugu", gaineratu du.
Marfany Radio Euskadi irratiko 'Ganbara' saioan elkarrizketatu dute. ANCko presidenteordearen ahotan, "kontsulta posible da". "Kataluniako Gobernuak kontsulta modu egokian prestatu du eta beharrezko egiturak prest ditu", adierazi du Marfanyk.
"Auzitegi Konstituzionalaren ebazpena Kataluniako herriaren borondatearen aurka doa. Kontsulta egin beharra dago", esan du. Azaroaren 9an "hautestontziak egongo" direla erantsi du Marfanyk.
Desobedientzia
Bestalde, Artur Mas Generalitateko presidenteak "atzera egingo ez" duela ziurtatu du ANCko ordezkariak. Gainera, desobedientzia ekintza bat ez litzatekeela izango uste du Marfanyk, "Kataluniako erakundeei obeditzea" baizik.
"Kontsulta galarazi dezakeen gauza bakarra beharrezko berme demokratikorik ez izatea da, hau da, segurtasun demokratikoa bermatu ezin izana", azaldu du.
