Azken bi urteetako kontuak argitaratuko ditu PSOEk ostegun honetan

Alderdiko Zuzendaritzaren eta Kongresuko eta Senatuko taldeen zuzendaritzetako kideen errenta-aitorpenak bere webgunean argitaratuko ditu PSOEk ostegun honetan, baita azken bi urteetako informazio finantziero guztia eta alderdiaren emaitzak ere.

Neurria goizean onartu du Alderdiko Zuzendaritzaren batzorde iraunkorrak. Kalitate Demokratikoaren Herritarren Foroa egiteko egun gutxi falta dira. Bertan Kode Etiko bat onartuko dute sozialistek.

Cesar Luena PSOEko Antolakuntza idazkariak azaldu duenez, "Espainian eta Estatuko alderdietan sekula aurrera eraman duten gardentasun ekimen handiena da".

Azken bi urteetako aurrekontuak, balantzea eta 2012ko eta 2013ko emaitzen kontua, kontu orokorren memoria eta alderdiko diru-sarreren eta gastuen zerrendak argitaratuko dituztela esan du Luenak prentsaurrekoan.

Maileguak eta kredituak

Gainera, alderdiaren maileguak eta kredituak, PSOEko kontrol prozedurak eta barru-auditoria, Europako azken hauteskundeetako kontuen emaitzak eta Kontu Auzitegiaren txostenak zehaztuko dituzte.

PSOEko zuzendaritzaren eta Kongresuko zein Senatuko taldeen zuzendaritzetako kideen errenta eta ondare aitorpenak argitaratu behar zituztela aspaldi agindu zuten sozialistek. Informazioa sozialisten webgunean argitaratuko dute 10:00etan.