EAEko herritarren % 51k kontsulta nahi dute, Madrilek baimendu edo ez

EAEko herritar gehienek Espainiarekiko harremanari buruzko kontsulta bat nahi dute, Espainiako Gobernuarekin akordioa egon edo ez egon, Eusko Jaurlaritzaren abenduko soziometroaren arabera.

Hain zuzen ere, galdetutakoen % 51k "edozein kasutan" nahi dute kontsulta egitea, eta % 23k, Espainiako Gobernuarekin akordioa badago baino ez. % 6 aurka daude, eta % 10ek ez dute erantzun.

Gehiengoa are zabalagoa da EAEko etorkizuna EAEko herritarrek eurek erabaki behar dutela uste dutenen artean. % 69 dira; beste % 24 erabakia Espainiako Estatuko biztanle guztien artean hartzearen aldekoak dira.

Gainera, lehen aldiz, independentziaren aldekoak gehiengo direla erakusten du inkestak. Horren ildotik, % 35ek Espainiatik bereiztea babesten dute, % 33k Espainian jarraitzea nahiago dute, eta % 20k testuinguruaren arabera hartuko lukete erabakia.

Espainiako Gobernuak onartutako erreferendum bat deituz gero, independentziaren aldekoen eta aurkakoen arteko aldea handiagoa izango litzateke. Izan ere, % 39k independentziaren alde bozkatuko lukete, % 29k aurka eta % 12 abstenitu egingo lirateke.

Oro har, EAEko herritarren % 72k Espainiako Konstituzioa erreformatzea nahi dute, lurraldeek Espainiako Estatuarekin zer-nolako harreman mota nahi duten erabakitzeko eskubidea gaineratzeko.